प्रज्वालितो ज्ञानमयः प्रदीपः इति गीताध्यानश्लोकेषु श्रूयते । व्याकरणे घटादयो मितः इति गणसूत्रम् । घटादिषु ज्वल् धातुः अपि पठितः । अतः ज्वलयति इति स्यात् मितां ह्रस्वः इति हेतोः । ज्वालयति इति कथं सिद्ध्येत्?

उत्तीर्णवन्त एव भट्टोजिदीक्षितवर्याः सिद्धान्तकौमुद्याम् -

उपसृष्टे तु नित्यं मित्त्वम् । प्रज्वलयति । कथं तर्हि प्रज्वालयति । उन्नामयतीति । घञन्तात्तत्करोतीति णौ । ¹

तस्मात् ज्वल् + घञ् = ज्वालः, तत् करोति तदाचष्टे इत्यनेन णौ विहिते ज्वालयतीति सिद्धम्। प्रज्वालयतीत्यत्राऽपि तथैव कार्यम्।